مرايتى لما ببص فيها
بشوف جمالى الجوانى
وبنسى انى جميلة
مرايتى لما ببص فيها
بشوف الحاجة اللى وجعانى
بس مفيش فى ايدى حيلة
مرايتى بتورينى حقيقتى
بتقولى اخيرا عرفتى
ان جواكى حاجات كتير
وانك مش محتاجة لتغيير
انتى محتاجة تلاقى اللى ضاع
محتاجة تنسى اللى باع
أرد عليها واقول صدقتى
انا فعلا بحس بنفسى
لما بعيش مع نفسى
الناس طالبين التزييف
احساسى بيهم أصبح مخيف
مفيش حد فاهمنى
مفيش حد عارفنى
والكل بيحاول يكون ظريف
الكل بيحاول يكون خفيف
الكل بيحاول يجمل الصورة
اللى مليانه زخاريف
مش بزخرف فى احساسى
بقول اللى جوايا
مش بذوق مشاعرى
شعورى مش محتاج مرايا
انا بس ببصلها
علشان اسالها ايه الحكاية
ودايما ترد عليا
وتقولى صدقينى بعد كل نهاية بداية
ليست هناك تعليقات:
إرسال تعليق