انشد يا قلبى

سنة جديدة فى عمرنا

مستنين ايه ؟؟ مسنين سنة جديدة فى عمرى وعمرك

مستنين حاجات تانية مش حتجى لا بامرى ولا بامرك

حاجات كتير مستخبية عننا

فيها الوحش وفيها اللى حيفرح قلبنا

مستنين أيه ؟؟

حب جديد ؟؟

طفل جديد ؟؟

شغل جديد ؟؟

ولا مستنين زمن جديد نغير فيه نفسنا ؟؟

سنة جديدة فى عمرى وعمرك

خليها تكون سنه سعيدة كلنا

ايدينا ى ايدين بعض

نفتكر اللى فى العراق والاقصى ونعمل حاجة ليهم كلنا مع بعض

بلاش نفضل طول الوقت نفكر فى نفسنا

وبلاش نفضل كمان حاطين ايدين على خدنا

تعالو نعمل حاجة ليهم فى السنة الجديدة كلنا

كل سنة وانتم طيبين

ضاعت حروف أسمى مثلما ضاع هو

فى كل المرات التى بحثت فيها عن ذاتى كنت أراه

كنت اتمناه واتمنى ان تعود أيام العمر الجميل

لما أكن أتوقع لحياتى الاستمرار بدونه

ولما اكن أتوقع ان أكون لغيره يوما ما

أين هو الان ؟؟ هل هو مع امراة اخرى غيرى ؟؟

هل هو يبحث أيضا يبحث عنى ؟؟

هل أنا ما زلت فى أحلامه ؟؟ وما زال ينتظرنى فى الطريق ؟؟

نعم انه الحب الاول لم يكن يوما وهما ولم يكن حقيقة أستمرت مع الايام

أنه ذكرى لا تنتهى حتى مع مرور الزمان

أنه بداخلى وفى كل مكان

أنه حبيبى فتى الاحلام

من أنا

شوية حاجات عنى :
انا بقى بحب اوى الرومانسية وبحب ان الانسان يكون رومانسى لانى بشوف ان الرومانسية بتخفف ضغوط الحياة اللى بنعيشها
انا بقى بحب اوى المزيكا بكل انواعها وبحب الالات الموسيقية كمان بكل انواعها وخصوصا الشرقية وبشوف بجد انها غذاء للروح والعقل والجسد كمان
انا بقى بحب اوى ان الواحد يكون صريح وميخفش من اى حاجة ويقول كل حاجة جواه انشالله تكون ايه ولمين وهو يعنى حيحصل ايه لو حتى حتموت قول اللى جواك ووقتها حتبقى ساعتك جت
انا بقى بحب اوى الصداقة وبشوف ان الانسان اللى ملهوش اصدقاء دة حاجة من الاتنين يا طيب اوى اوى يا لئيم اوى اوى الصداقة دى هى معنى وجودك فى الحياة
انا بقى بحب اوى البيت بيتوتيه جدا وبحب كدة اقعد والبيت يكون نظيف ورايق وريحته حلوة وانور اباجورة او اضاءة خلفية خفيفة كدة واسهر اسمع الاغانى اللى بحبها كلها واكتب او امسك كتاب اقرى فيه او يا سلام بقى على مج كاكاو بالحليب فى الشتا قدام فيلم ابيض واسود قديم والواحد قاعد مدفى كدة الله الله الله

انا بقى بعشق السهر والليل وبلاقى نفسى جواه ونسهر سوا انا و الليل نحكى ونفتكر حاجات جميلة راحت ومش راجعه تانى
انا بقى بحب اوى الشغل وبشوف ان الانسان اللى مش بيشتغل زيه زى الميت بحب اشتغل فى كل حاجة واتعلم اكتر من حاجة مش بحب اوقف نشاطى او خبرتى عند شىء معين
انا بقى بحب اوى العيلة ولمة العيلة وبحب اوى اهلى وقريابى وبشوف ان هما دول اللى بيدو طعم للحياة ।

كفاية عليكم كدة اه ما هو مش لازم الانسان يكون كتاب مفتوح للى قدامه ودى باردو من الحاجات اللى بحبها اوى الخصوصية

حنينى هنا والحب الاول هنا وذكريات العمر الجميل هنا

بلاقى نفسى هنا وبتعرف عليها من جديد

كل واحد فينا فى الحياة عنده حاجات بيحب يعملها وحاجات بيلاقى نفسه فيها
كل واحد فى الحياة عنده حاجات بيعتز بيها وحاجات ميقدرش ابدا انه يستغنى عنها
كل واحد فينا عنده ذكرياته وعنده حاجاته عنده ايام بيحبها وساعات بيدور دايما عليها
كل واحد فينا بيستنى الوقت اللى بيعمل فيه الحاجة اللى بيلاقى نفسه جواها
انا بلاقى نفسى مع قلمى وكراستى وجهاز الكمبيوتر
اللى بيخلينى انسى الحياة وكل اللى براها
بلاقى نفسى فى خواطرى واشعارى حتى لو مكنش مظبوط او متنسق
المهم انى اطلع اللى جوايا وميهمنيش انه يكون بالفل والورد متزوق
بلاقى نفسى فى سطورى اللى بسرد فيها معانى الحياة
سطورى اللى بتستحملنى وبتخلينى مقولش حتى الاه
ولما بشوف تعليق مكتوب على سطر من السطور
ولا بشوف مشاركة من شخص حتى بالنسبة ليا مجهول
بحس بفرحة زى فرحة الطفل بلعبه جديدة مبهور
واحلى حاجة فى سطورى انها من قلبى انا
من ايدى انا وكلامى كله مافيش منه اى شىء منقول